चलचित्र ‘छ माया छपक्कै’ का निर्देशक दिपेन्द्र लामाको लेखन तथा निर्देशनमा निर्माण हुने चलचित्र ‘२ नम्बरी’को छायाँकन चलिरहेको समयमा सरकारले लकडाउन गरेपछि काम रोकिएको थियो । करिब ३० प्रतिशत छायाङ्कन सकेको चलचित्रको काम रोकिएको ४ महिना बित्न लागिसकेको छ । महामारी सामान्य हुन कति समय लाग्ने हो टुङ्गो नभए पछि केही चलचित्रले आफ्नो सेड्युल नै पछि सारेका छन् । यस्तैमा चलचित्र ‘२ नम्बरी’ निर्माण पक्षले फागुन अगाडि चलचित्रको काम सुरु नगर्ने निर्णय लिएको छ । चलचित्र छायाङ्कनको लागी उचित दृश्य फागुन अगाडि नपाइने भएपछि निर्माण पक्षले यो निर्णय लिएको हो ।

चलचित्रमा दयाहाङ राई, उगेन छोदेन (भुटानी अभिनेत्री), पल शाह, वर्षा राउत, बुद्धि तामाङलगायतका कलाकारहरुको अभिनय रहनेछ । एउटा सुन्दर गाउँका २ जना साथी, उनीहरुको मित्रता र दुश्मनीको कथामा बन्ने चलचित्र ‘२ नम्बरी’ले समाजमा हुने गरेका २ नम्बरी कामलाई पनि उठान गर्नेछ । रेड बर्ड प्रोडक्शन र आरआर फिल्म प्रोडक्शनको ब्यानरमा निर्माण हुन लागेको यो चलचित्रमा कार्यकारी निर्माताको रुपमा रत्न श्रेष्ठ छन् । किरण नेपालीको प्रस्तुतिमा तयार हुन लागेको चलचित्रमा रोहित कट्टेल र सरोज नेपाली निर्माताको रुपमा छन् भने अमलादेवी राई सह–निर्माताको रुपमा छन् । चलचित्रमा सुशन प्रजापतिको छायांकन, रामजी लामिछानेको कोरियोग्राफी रहनेछ ।