केही दिन अगाडि अभिनेत्री साम्राज्ञी आरएल शाहले इन्स्टाग्राममा एक भिडियो साझेदार गर्दै चलचित्रमा काम गर्दा निकै नै नराम्रो व्यवहार भोगेको बताएकी थिइन् । सेयर गरेलगत्तै साे भिडियो निकै भाइरल भएको थियो । साम्राज्ञीले भिडियो सेयर गर्नुभन्दा केही समय अगाडि आफ्नो डेब्यु चलचित्र ‘ड्रिम्स’को छायांकनमा अभिनेता अनमोल केसी र आफूमाथि पक्षपात गरिएको समेत बताएकी थिइन् ।
उनले आफूलाई दुर्व्यवहार हुँदा असह्य हुने गरेको र यसकै कारण दोहोर्याएर उक्त व्यक्तिसँग काम नगरेको समेत बताएकी थिइन् । उनले यो कसलाई लक्षित गरेर भनेको भन्न नसके पनि उनले डेब्यु गरेको चलचित्रका निर्देशक भुवन केसीलाई नै लक्षित गरेको हो कि भन्ने अनुमान गर्न सकिन्छ । यसैको आधारमा साम्राज्ञीले बोलेको भोलि पल्ट अभिनेता तथा निर्माता भुवन केसीले साम्राज्ञीलाई इंगित सामाजिक सञ्जाल फेसबुकमा स्ट्याटस पोस्ट गरेका छन् । उनी लेख्छन्, ‘खान नपाएको भन्दै सामाजिक सञ्जालमा रोई कराई गर्ने हिरोइन अहिले कुन फिल्मको नाम बेचेर खाइरहेकी छिन् ? जुन थालमा खाने त्यही थालमा दुलो पार्ने । सामाजिक सञ्जालमा गर्ने बराबर अभिनय फिल्ममा पनि गरे हुने नि !!’ भूवनले आफू निर्देशित चलचित्र ‘ड्रिम्स’बाट साम्राज्ञीलाई चलचित्र क्षेत्रमा प्रवेश गराएका थिए ।
