सामाजिक विषयमा निर्मित चलचित्र ‘धुलो’ को फर्स्टलुक पोस्टरसँगै प्रदर्शन मिति सार्वजनिक गरिएको छ । आउँदो फागुन १६ गतेलाई प्रदर्शन मिति घोषणा गर्दै मंगलवार सार्वजनिक गरिएको पोस्टरमा चलचित्रका प्रमुख कलाकारहरु बुद्धि तामाङ, अग्रज केसी र श्रृजना सुब्बा फिचर्ड छन् । प्रद्युम्न मिश्रले चलचित्रको निर्देशन गरेका हुन् । उनले यही चलचित्रबाट निर्देशनमा डेब्यू गरेका हुन् ।
रिक्सा चालकको सपना, लक्ष्य, संघर्ष र जीवन शैलीलाई प्रस्तुत गरिएको ‘धुलो’ मा बुद्धि, अग्रज र सृजनासँगै प्रद्युम्न मिश्र, दामोदर गजुरेल, अमृता पाण्डे र बाल कलाकार सुदीप कार्की मुख्य भूमिकामा छन् । नीर शाह, सुशील पोखरेल र लक्ष्मी बर्देवाको चलचित्रमा विशेष भूमिका रहेको निर्माण टिमले बताएको छ । ‘हैट’ उपनामले चिनिने बुद्धि चलचित्रमा मजदुरको भूमिकामा छन् ।
सिके वाग्लेको प्रस्तुति रहेको चलचित्रको निर्मातामा लक्ष्मी गौतम र नानीराम फुँयाल तथा सह निर्मातामा दीपा धरेल छिन् । सुवास सिंह बस्न्यातको लेखन, रबिन आचार्यको छायांकन र अर्जुन जिसीको सम्पादन रहेको चलचित्रको गीतको कोरियोग्राफी कबिराज गहतराज र रामजी लामीछानेले गरेका हुन । निर्देशक मिश्र ‘धुलो’ अत्यन्तै मर्मस्पर्शी कथामा निर्माण भएको बताउँछन् । चलचित्रलाई आरआर फिल्म्सले वितरण गर्दैछ ।
