‘फाटेको जुत्ता’ फेम्ड निर्देशक निकेश खड्का निर्देशित चलचित्र ‘चपली हाइट ३’मा समावेश पहिलो ‘चार आनाको मसला’ बोलको गीत सार्वजनिक गरे लगत्तै निर्माण टिमले चलचित्रको प्रचारप्रसार तीव्र गरेको छ । यसबीच चलचित्रप्रति दर्शकको चासो बढाउन निर्माण टिमले दर्शकलाई बैंकक घुमाउने उपहार योजना ल्याएको छ । र, त्यसका लागि चलचित्रको ‘चार आनाको मसला’ बोलको गीतमा टिकटक बनाउनुपर्नेछ ।
चलचित्रका निर्माता अर्जुन कुमारले प्रथम हुनेलाई बैंकक घुमाइने बताए । सबैभन्दा धेरै लाइक र भ्यूज पाएको टिकटक भिडियोमध्ये एउटालाई विजेता घोषणा गरिने बताइएको छ । यो प्रतियोगिताले चलचित्रको प्रचार-प्रसारमा ठूलो सघाउ पुर्याउने विश्वास निर्माण टिमले लिएको छ । चलचित्रको ‘चार आनाको मसला’ बोलको गीतलाई दर्शकबाट सकारात्मक प्रतिक्रिया मिलेको छ ।
सस्पेन्स थ्रीलर कथामा निर्माण गरिएको चलचित्र ‘चपली हाइट ३’लाई काठमाण्डौ र यसको आसपासको क्षेत्रमा खिचिएको छ । आउँदो चैत २८ गतेबाट देशव्यापी प्रदर्शनमा आउन लागेको ‘चपली हाइट ३’ मा स्वस्तिमा खड्का, सुपुष्पा भट्ट, आमिर गौतम र महेश त्रिपाठीसँगै प्रतिकमान श्रेष्ठ, अर्पण थापा, दीपाश्री निरौला, लक्ष्मी बर्देवा, लोकेन्द्र लेखक, विशाल पहारी, जीवन भट्टराईलगायतका कलाकारहरुको पनि अभिनय रहेको छ ।
यो चलचित्रको बक्सअफिसमा चलचित्र ‘प्रेमगीत ३’ सँग भिडन्त हुनेछ । नाम नै ब्रान्ड बनिसकेको यस चलचित्रमा स्वस्तिमा-महेश र सुपुष्पा-प्रतिकको जोडी बाँधिएको छ । ‘चपली हाइट ३’ लाई अर्जुन कुमार फिल्मस् र केडिसी हस्पिटलले मिलेर निर्माण गरेका हुन् ।
