विश्वका आठ हजार मिटरभन्दा अग्ला १४ वटा हिमाल सात महिनामा आरोहण गरेर विश्व कृतिमान राखेका आरोही निर्मल पुर्जा पुनको वृत्तचित्र (डकुमेन्ट्री) ‘फोर्टिन पिक्स: नथिङ इज इम्पोसिबल’  सोमबार नेटफ्लिक्समा सार्वजनिक भएको छ । यो वृत्तचित्र १९१ देशमा ३१ भाषामा प्रस्तुत गरिने छ ।

३६ वर्षीय पुर्जाले ‘प्रोजेक्ट पसिबल’ अन्तर्गत १४ वटा हिमालको सफल आरोहण गरेका थिए ।  वृत्तचित्रमा नेपालको हिमाल आरोहणको इतिहासलाई पनि समेटिएको छ । पुर्जाले छोटो समयमा गरेको हिमाल आरोहणको यात्रा वृत्तचित्रको प्रमुख विषय हो ।

यसमा पुर्जाको व्यक्तिगत जीवनको उतारचढावलाई पनि समेटिएको छ । पुर्जाले डकुमेन्ट्रीमा यो मिसनको उद्देश्य, सुरुवात, टिम र अनुभवको विषयमा कुरा गरेका छन् ।