‘परदेशी २’ आउँदो वर्षको दशैंमा प्रदर्शन हुने

चलचित्र ‘परदेशी २’ अर्को वर्षको दशैंमा प्रदर्शनमा आउने तयारीमा छ । चलचित्रलाई यसै वर्षको दशैंमा प्रदर्शनमा ल्याउने तयारीमा गरिएको थियो । तर कोरोनाको कारण छायांकन ढिला भएकोले प्रदर्शन हुन सकेन । अब यो चलचित्र अर्को वर्षको घटस्थापना वा फूलपातीमा प्रदर्शन हुनेछ । चलचित्रको कथा नै दशैंसँग जोडिएकाले दशैंमा प्रदर्शन गर्दा राम्रो हुन्छ भन्ने धारणा निर्माण टिमको रहेको छ ।

नारायण रायमाझीले निर्देशन रहेको यो चलचित्र २०१५ मा आएको सुपर हिट चलचित्र ‘परदेशी’ को सिक्वेल हो । नेपाल र अमेरिकामा छायांकन भएको यस चलचित्रमा मानकृष्ण महर्जनको छायांकन, अष्ट महर्जनको द्वन्द्व, बिबि अनुरागीको संगीत, गोविन्द राई र रामजी लामिछानेको कोरियोग्राफी र दीर्घ खड्काको सम्पादन छ ।

रमेश विजीले लेखेको यस चलचित्रलाई निर्देशक रायमाझी र राजेश वंशलले निर्माण गरेका हुन् । दीलिप रायमाझी, प्रशान्त तामाङ, प्रकाश सपूत, केकी अधिकारी, वर्षा सिवाकोटी, देबेन्द्र बब्लुलगायतका कलाकारको अभिनय रहने ‘परदेशी २’ मा विदेश पढ्न गएका विद्यार्थीको दुःख र त्यहाँको संघर्ष देखाइनेछ । यस चलचित्रबाट गायक प्रकाश सपुतले नायकको रूपमा डेब्यू गर्न लागेका हुन् ।

Leave a Reply