आगामी फागुन १३ गतेबाट प्रदर्शनमा आउने तयारीमा रहेको प्रतिक्षीत चलचित्र ‘म यस्तो गीत गाउँछु २’को टिम कम्मर कसेर प्रचार प्रसारमा लागिरहेका छन् । दर्शकलाई हलसम्म तान्न चलचित्रको गीत, ट्रेलर वा टिजर मात्र प्रचारको शैली बनिरहेको बेला ‘म यस्तो गीत गाउँछु २’ ले प्रचारको नयाँ शैली भित्राएको छ ।
प्रचारमा नयाँ शैली अपनाउदै निर्माण टिमले बुधबार थारु भाषामा चलचित्रको प्रमोशनल गीत सार्वजनिक गरेको थियो । त्यस्तै, बिहीबार भने नेवारी भाषामा चलचित्रको प्रमोशनल गीत सार्वजनिक गरिएको छ । काजिश श्रेष्ठले निर्देशन गरेको भिडियोमा मुख्य कलाकारद्वय पल शाह र पूजा शर्मा नेवारी पहिरनमा देखिएका छन् । गीतमा आश्रय रञ्जित र कल्पना श्रेष्ठको स्वर र नरेश जोगीको शब्द तथा संगीत छ । सम्भवत चलचित्रको लागि थारु र नेपाल भाषामा प्रमोशनल गीत बनाएर प्रचार गरेको यो पहिलो पटक हो ।
सुदर्शन थापाको निर्माण तथा निर्देशनमा तयार भएको चलचित्रको प्रचारप्रसारमा दौडधुप गरिरहेको चलचित्रको टिम केहि दिन अघि नै हलमा पुगेर माहोल बुझ्न पुगेका थिए । उनीहरुले हलमा पुगेर दर्शकसँग प्रत्यक्ष साक्षात्कार गर्नुका साथै हलका कर्मचारी र म्यानेजरसँग पनि दिनहुँ जसो भेटघाट गरिरहेका छन् । यो चलचित्र यही फागुन १३ गते रिलिज हुँदैछ । पल र पूजा चलचित्रको प्रचारका लागि अन्तरवार्ता, पत्रकार सम्मेलन देखि चर्चित टेलिसिरियल र रियालिटी शोहरुमा समेत पुगिरहेका छन् ।
चलचित्रको सार्वजनिक भएको ‘तिम्रो घरको वरिपरि’,‘दुःखको काँडा’ र ‘कसम कसम’ बोलको गीतलाई दर्शक तथा श्रोताले निकै रुचाएका छन् । चलचित्रको ट्रेलरलाई पनि दर्शकले अत्याधिक मन पराएका छन् । सांगीतिक प्रेम कथामा तयार भएको चलचित्र ‘म यस्तो गीत गाउँछु २’ मा पल र पूजाका अलावा हरिहर शर्मा, दिनेश डिसी, राजा राजेन्द्र पोखरेल, सोनिका रोकायलगायतका कलाकारहरुको अभिनय छ ।
