चलचित्र ‘चपली हाइट ३’ तेस्रो पटक प्रदर्शन हुने भएको छ । निर्माण कम्पनी अर्जुन कुमार फिल्मस्ले बिहीवार एक विज्ञप्ति जारी गर्दै ‘चपली हाइट ३’ यही साउन २० गतेबाट पुनः प्रदर्शन हुने जानकारी गराएको छ । यो मितिमा नेपाली चलचित्र ‘म’ र ‘आँधी तुफान २’ पनि प्रदर्शनमा आउने तयारीमा छन् ।
गत पुस ३० गतेदेखि प्रदर्शनमा आएको चलचित्र ‘चपली हाइट ३’ प्रदर्शन हुँदाहुँदै कोरोनाको तेस्रो लहरका कारण सरकारले गत माघ ३ गतेबाट सिनेमा हल बन्द गर्ने निर्णय गरेपछि प्रदर्शन स्थगित गरिएको थियो । र त्यसपछि हल खुलेपछि गत फागुन १ गतेबाट चलचित्र पुनः प्रदर्शन भएको थियो । २०७६ सालमा कोरोना महामारीका कारण पनि चलचित्रको रिलिज रोकिएको थियो । धेरै लामो पर्खाईपछि ‘चपली हाइट ३’ प्रदर्शन भएको थियो ।
‘फाटेको जुत्ता’ फेम्ड निर्देशक निकेश खड्का निर्देशित चलचित्र ‘चपली हाइट ३’ मा स्वस्तिमा खड्का, आमिर गौतम, सुपुष्पा भट्ट, महेश त्रिपाठी, अर्पण थापा, तीकमान श्रेष्ठ, दीपाश्री निरौला, लक्ष्मी बर्देवा, लोकेन्द्र लेखक, विशाल पहारी, जीवन भट्टराई, सुष्मा निरौला लगायतका कलाकारहरुको अभिनय रहेको छ । आकाश बरालको पटकथा तथा संवाद रहेको चलचित्रमा सुभाष भुषाल र अर्जुन कुमारको संगीत छ ।
अष्ट महर्जनले चलचित्रको एक्सन दृश्यको कोरियोग्राफी गरेका हुन् । सस्पेन्स थ्रीलर कथामा निर्माण गरिएको चलचित्र ‘चपली हाइट ३’लाई काठमाण्डौ र यसको आसपासको क्षेत्रमा खिचिएको छ ।नाम नै ब्रान्ड बनिसकेको यस चलचित्रमा स्वस्तिमा-महेश र सुपुष्पा-प्रतिकको जोडी बाँधिएको छ । ‘चपली हाइट ३’ लाई अर्जुन कुमार फिल्मस् र केडिसी हस्पिटलले मिलेर निर्माण गरेका हुन् ।
